超級無敵惡人惡語
事鬼爛旦啦，想記低啲嘢，唔想咁拘謹 呢排能量好奇怪，成日想爆想爆，諸事不順，成日想吊狗人，但同時又好似睇穿咗自己以前一啲難以控制既嘢咁，一定係行星活動問題 記低自大先：其實我係咪自大真係唔識分，基本上都會相信自己的第一感覺先，可能對於了唔了解人係會自大啲，因為自覺都幾中意品評人，但對於事、知識就唔算自大 點解會咁樣問係因為我諗緊係咪因為自己自大所以做嘢／行動時會綁手綁腳，放唔低個自尊，OK已經將啲TERMS撈到亂晒 關於自大既一個最惡劣回憶，就係大學時，做副老總，幫同學睇稿，有人寫咗胡適之，我好慶，在會上問點解會多咗個「之」字 XDDDDD 衣家識笑，當時同學們反應係好冷靜咁講，「胡適之」係本名；呢個回憶成日都會浮上嚟，笑返自己，指責返自己，都係個幾暗黑的回憶壓力 所以之後好多時候，有疑團都唔敢講出口，驚自己又柒咗，影響自己辛苦建立既偽學人形象 BUT，咁咪就係越嚟越冇膽，仲學少咗嘢囉，果真笨柒 治療時間：如果衣家既我，走返去以前嗰個moment，我會同嗰陣時既我講，係喎，係笨柒咗喎，係怪錯人喎，但同學們都好好咁講返個答案，即係佢地其實唔會介意你學養唔夠啦，根本冇人笑你，起碼你冇聽到； 即使係有，而自己亦覺得無知，咁亦唔駛咁介意呢類「笨柒moment」，人人都會有，學返個正確答案，咁就冇事啦，咁就昇華啦。日後，期許自己唔駛怕「笨柒moment」，你贏人既心，係從誠意誠懇攞分，唔係學識，知冇？ OK 第二個，我想記低我好開心好開心好滿足既一啲時候 中四五做班長係我人生最滿足既時候（之一），呢個回憶好難忘，因為突然間有咗責任，成個人唔同咗，第一次知道要出力要發力，而為同學服務呢樣嘢都係出自真心，亦做得十分認真，同學們亦睇到我既努力同有所讚賞，真係好開心 另外一啲時候，係WWF時代一個人做排版既時候，雖然基本上冇設計或排版技巧可言，但係對住呢類可以發揮美感類既嘢，會特別投入，一投入，人就自然無雜念，時間都會過得開心啲； 回想係大學時代開始做網頁，整BLOG，都牽涉呢類美感發揮類，都係好開心既。而且仲係有成功感添。 跟住記憶中就係大吉時代，寫完份內部用九龍皇帝展覽by section簡介，真係YEAH到彈起，完筆時，好似中七會考寫中文文化科考卷時有果種十拿九穩既感覺，好勁，覺得自己寫得好好，係概念諗得好好，唔係文...