聽見了嗎

注 定 流 水 帳

好耐冇更新，大家都好嗎？

九至十二月發生咗咩事呢？

最勁梗係完成山藝二級啦！
年頭完成閒HEA一級入門班，估唔到二級難咁多，不但要學進階圖針、繩結，仲有三次實習，包括兩次露營，要full gear玩（孭成廿LIT），夜行蚺蛇尖，第二日仲要行澗兼玩爬懸崖（好安全既），實在太刺激。
整個過程多得隊友同教練助教幫助、提點，亦好多謝自己冇放棄。其實只要唔lur地唔行，就一定完成到！最實用係行咗好多浮沙碎石斜，成支竹既雙腳儘管仲係震到冇朋友，落斜係熟手咗少少既。另外係玩完兩次重裝露營，身體都仲吃得消，翌日成功(!)返工，覺得自己身心都更硬淨！呢次投資都唔少，好彩向好友借到營具帳篷，甚至行山鞋，最後點都因為需要而買咗cheap cheap行山大背包、幾件快乾衫、好貴既行山杖、襪、煲具等等大大小小裝備，大概等於去台北三日兩夜啦！
三級係冇可能架啦，佢地都唔會收我，我亦冇諗住考，二級剛好。不過，會努力行多啲，同時鍛鍊下身體，或者出年會考慮報健體班，有個班箍住係會認真啲既。


十一月仲玩咗其他嘢，好似上咗兩堂香港歷史學會搞既中國古地圖及社區地圖堂，內容超豐富，老師超勁，同學亦超投入！例如講點睇中國古地圖，又點樣製作一張社區地圖。遲下睇吓有冇機會再分享！


除此以外，九月開始咗在HKU SPACE學繙譯，係一個半年既Post Grad Cert課程。嘩，初初係有啲唔知點，好耐冇返學，有啲唔慣，要準時收工（一向準時）、預晚飯、做功課，有少少踢腳。讀咗兩個多月，老師改簿鬆手，功課成績尚可，最重要係學到幾多呢到底，係好多喎又真係！英譯中還好，可用老本，英文唔夠好，基礎唔實，中譯英係個大挑戰！同埋到底意譯到邊個程度，譯筆張弛要點拿捏，文章用係邊亦會影響風格，都有更多認識。呢班既同學仔大多係寫得之人，可惜堂上交流唔算深刻，大家志在輕輕鬆鬆又一堂。另外最大收穫係上到一啲好有教學熱誠既老師既堂，有少少估唔到，原來SPACE的老師咁有心！上堂又超多準備，又好笑又認真，好尊敬佢地！


OK，讀書報告同寫作方面停滯咗，要加把勁！
只不過，工作上竟然變成主要寫英文或中譯英！好多機會畀我練習！除咗籃球遊戲活動寫作，上兩個星期又加入賽馬遊戲活動中譯英，真係發夢都估唔到要上賽馬會網頁去學點睇啲評述同排位！刺激到呢！馬經編輯同事雖然會解釋我聽，但譯個下始終係盲中中，暫時左抄下右抄下都仲頂到！


咁過咗十一月呢，我又開始朋友計劃勒，目前主要客戶有兩位，一個要備戰亞運，唔係，係十公里，另一位竟然用到我既少少畫畫排版能力，幫到朋友，大開心！


嗯，呢啲都係值得講既事，當然仲有啲中女心事啦！
都冇咩，好乾，咁囉！
或者出年要定個目標係著靚啲，注意返下個儀容，哈哈哈！
出年目標已經靜靜組織緊，希望要好似今年咁做到七八成咁成功！！



其實我心情好既時候真係個又好又得意既人，好值得愛(同被愛)架～哈哈哈～～

BYEBYE～

係時候轉下個LOOK，或者從眼鏡開始，又係錢⋯⋯Orz