好啦，既然個心亂亂地，就寫低佢。

之前去兆基手作市集，途經樂富圖書館，好偶然咁突然攞起小克的偽科學鑑證6新平衡。
小克，好耐之前鍾意過，好大部份係因為係佢既作品同形容中搵到麻煩天秤座的影子，好有共鳴，好似佢畫過一篇牙齒，我都成日會諗器官同器官講嘢，同時間又係黑色默默tone，仲有啲念舊重情，不過梗係冇佢咁有學識同觀察力，佢鋼筆書法仲好靚，行文流暢又生鬼，雖然佢話佢唔識講嘢，但按道理睇佢既文章，佢應該可以出口成文。好，又扯咗去外太空。之後唔知點解就冇再追佢既嘢，嗰日好偶然喺特大圖書架見到，就開嚟睇睇，點知！竟然讀到佢寫人類圖，正是大妹我剛剛接觸的新興興趣，估唔到佢已經算過，仲學埋佛法灌咗頂，學埋SRT，全部我都唔識，但都有少少興趣知道的。

覺得人的軌跡好得意。

人類圖都幾複雜，亦大把人想學，你上公共圖書館網搵吓「回到你的內在權威」、「找回你的原廠設定」呢幾本書就會知幾爆。之前上網搵資料，搵到個好無私寫人類圖筆記的台灣網誌，好撞鬼地當我睇咗一日成舊雲翌日想再去參詳時竟然全部文都鎖起曬！真係好邪好黑仔，仲諗多咗係哦我琴日睇得太多太耐嚇親網主，但原來係佢個人受到某些自認為亞洲人類圖第一人的攻擊，嬲死第一人囉我家陣！

寫到依家都寫唔到啲咩。哈～～

個心仲係咁亂。

。。。。

上一篇寫咗要放低成功，因為我成日想成功，但結果都冇出力。
檢查返個創作blog，成年先寫得四篇文，係咪食太多tea，咁hea的？
又有時會嫌自己冇進步冇進展，又唔記得自己其實都做咗少少嘢，於是又開始另一個記錄大計，好似以前小學寫手冊咁，寫低每個星期計劃做咩閱讀、寫作、創作之類的功課，又mark返低進度或者做咗乜，希望咁樣可以幫到自己心情唔會成日咁糟糕。
（寫網誌都計架，哈～～）

或者之後要整返本超大日記，記得埋啲開心大發現添！


細想一下，我咁樣練寫作，最終目的，只係想寫出啲喺腦海既嘢，小小創作，所以文筆都唔係最重要，當然寫得靚加好多好多分。
有時難免酸葡萄，會比較大同美姿的天生眾的文筆，深知冇得比，翻翻亦是出手成文，不計翻譯功力，只看以往的網誌都好好看，用典潮語，融會貫通。點解要搵啲咁勁的人去比較呢？　喂！　其實係點解要去比較呢？如果比較可以有鞭策功能，比比無妨，但你停留在比較就傷身傷心了。人家是不斷進步的，競爭是會找上你的！ XDDDD


好吧！所以認清自己練習寫作的目的，會冇咁驚青。咁麻煩你繼續爆發你個啲觀察同想像力，橋幾舊都好幾埋唔到尾都好，都係自己個仔個女。都係個句，當然文筆好啲，係會加分的。

同時間，我又唔係要比較創作力同創意喎。要注意。
嘩，你都畀好多走盞位自己啫！　係！

我係想用十年時間慢慢靠呢啲小創作小故事磨返自己個稜角出嚟（唔係磨走？）。
人類圖指我既原廠設定中有多愁善感一條，星座命盤話如果唔創作唔表達唔展現吓我嗰啲咁多藝術能力既話呢世係會唔開心架，而經驗話我知，你寫嘢設計吓嘢既時候係最開心最集中既，心中同腦海中都一直係咁講喎，咁所以……

喺呢個咁清閑既工作中，少不免會驚呢樣嗰樣，嗯，其實係冇關，點都搵到嘢驚。
喺呢個咁清間既工作中，如果唔能夠直接有工作作為訓練，又或者，唔係好可以成日寫到啲精彩既文章或故事，咁就進行大量閱讀啦，四處吸收啦，做吓筆記啦（呢點好重要，否則容易水過鴨背），可以存吓存吓，唔好太介意自己冇作品，反正一直以來都冇作品架啦！係咪！！