今個星期一好刺激，要記底。
朝早受託買蘇打綠演唱會飛，攞咗部macbook air返公司，雙機！打埋電話！搞咗成個幾鐘，本來已諗住放棄，一直都冇運仔，同事又開始返嚟，費事咁揚，收埋部mac，轉為偷偷reload，點知最後竟然入到，雖然買唔到最貴飛，但都買咗中間的，好難得咁lucky，入信用卡冧巴時震都手曬，任務完成後忍唔住獎自己飲杯紅茶！YEA！

之後係打電話訂鞋。買嘢對我嚟講都有負擔架，除咗用錢，呢次仲有個原因係因為呢次對鞋係搵人訂造的。話說之前見本地有手作人推介自己爸爸的手造鞋，平時一對clarks都成千幾蚊，咁我不如支持本地創作仲好。間嘢叫Pa Pa Shoes，爸爸喎，中曬我下懷啦，Hea咗好耐終於搵日去拜訪，係葵涌工廠，上去前要打個電話費事摸門釘。師傅姓謝，年紀唔算好大，佢超好人，教曬我點坐車點行去。去到，講咗兩句，就幫我度腳，見佢屈身，我超唔好意思，我叫自己唔好咁迂腐諗太多，因為你面前既係一位master/craftman，要信任佢既專業同真誠。之後佢叫我揀色，有得選擇，呢次弊勒。心入面係想造對淺色啲既，諗住易襯，又文青啲，但師傅個邊冇喎。佢因著皮的硬度和鞋款，建議咗兩組顏色配搭，仲剪咗少少辦畀我返去慢慢諗。去既時候係二月中，快過年，師傅話佢訂單太多，造都造唔切，我話我一啲都唔急叫佢唔駛擔心，佢聽完不知幾開心，於是我就攞咗啲辦返去慢慢諗勒。點知一諗就諗咗成個幾月，當中都有因為成千蚊一對鞋又開始有少少想縮沙，諗住豪咗個一舊水訂金，又覺得始終唔係心水顏色，無謂勉強，總之諗到好煩啦！呢種翻來覆去太折磨，浪費時日，於是我就決定，繼續做落去，既然都畀咗訂，本身又想支持師傅同本地手藝，咁係值得的，而且，用戶體驗方面，你唔試過都唔知好唔好著，而你又確實需要一對鞋，咁點解唔做。好啦，我知我好煩。所以隔咗成個幾月，係周一下午就打電話去問，初初仲驚師傅已經唔記得我，或者點點點，諗得人好衰咁，但一接電話，佢竟然有mark底係手提，仲叫到我張小姐，真係抵曬啦！終於，揀咗色，亦叫佢話唔急，整好再話我知，就係咁，了結咗我搞咗成個幾月的一件小心事。

之後呢，我本來想報讀英協的course既，諗住周一去報名個能力測試，點知望真啲先發現之前睇中既course係初級班，應該唔太適合。好惆悵啊！仲未搵到適合的course報呀！我咁desperate，係因為份工真係好閒，幾穩定，想襯呢段時間去進修，唔駛咁大壓力嘛。

最後的刺激任務，咪就係煮晚飯囉。阿媽去旅行，我已經連續六日煮晚飯，餓親阿爸係好大件事的。放咗工立馬返西灣河買餸，嗰日煮咗豉椒肉片，好OK喎！當然同出面的仍差天拱地，但都算係咁啦！職業女性仲要照顧頭家，真係好Q難架原來！