經過幾日m期抑鬱, 我又復活啦!

．．．

今日剪咗個死人頭，再去後山跑步，鬆動估計都有800米架，腳仔頸仔都鬆弛咗，再去行吓康怡太白城睇吓有冇西裝褸，買咗fokmocs DVD同food inc VCD，入商務揭吓最新書刊，食咗吉吉家下午茶，緩慢步行回家，十二個爽！

．．．

下個禮拜搬上六十四定六十五樓啦，頂！好撚驚呀，頂！醒定呀！

．．．

喺中環或金鐘返工嘅朋友，香港公園嘅內茶具文物館，係hea嘅好地方。當年係天橋底返工咁耐都冇去過，真係蝕晒，唔駛錢架！勁力推介係樓上嘅展覽廳，其中一條片係製作紫砂茶壺的三種常見方法的示範，睇完條片你會覺得好平靜，好滿足，因為片中嘅姨姨，用佢對肉手，好耐心好細心咁整好三個工序繁複嘅茶壺，實在欽佩不已，加上剪接好，影片顏色contrast剛好，令人覺得條片好似睇緊以前好中意睇嘅日本風情畫。片雖然長，但竟然會令我有滿足嘅感覺。

當然呢類舊樓翻新循環再用都不免要睇吓呢座建築物原來嘅歷史，有時展版上面一大堆字，會睇到人傻。文物館本身係Flagstaff House，要了解佢嘅歷史，不妨去嗰間兒童遊戲室，當中有一本巨型圖書，介紹咗呢座建築物嘅歷史同歷年宿主，好易明，又大大本好易睇，有小朋友嘅又可以畀佢喺度玩吓，都幾爽架！

另外要讚嘅係佢嘅雙魚咩咩紀念品店，可謂係全康文署轄下博物館中紀念品店中賣嘅嘢最relevant又多嘢睇嘅一間！讚！（你又估吓最差之紀念品店係邊間　－　係太空館！簡直睇到要燒著）　

大家有機會都去行吓啦！