近年開始多咗出街食飯, 有幾間係覺得唔錯嘅 (唔駛車輪我, 大家各飯入各肚, 況且我都唔太識食):

樂林小鍋米線 - 喺公司附近, 好適合一條冷嘅我 (冇錯! 我係絕少同同事食飯嘅宅秤寶寶!) , 米線大大碗, 一餸四/五雞, 我細食(!), 加上佢通常加半隻鹵水蛋, 一大堆草(芫茜、葱、酸菜、芽菜), 一餸都夠飽, 加熱飲都係加三雞, 埋單只需$30內。我平時都好少要求服務, 但佢嘅服務真係唔錯, d待應, 有大隻嘅, 都普通的佬和哥仔, 全部都唔會粗粗魯魯, 亦可能由於有熱湯又咁大碗嘅米線嘢, 佢地都會對啱你點嘅, 再好輕手咁將碗嘢放喺你面前, 執枱都係淡淡定慢慢黎, 起碼唔會搞到d酸辣湯水飛濺, 或者收匙收筷棒棒聲, 食都食得放心。

十勝豚丼 - 即係又係d幾十蚊食到你飽屎個隻又唔會口鞋鞋個類。第一次食, d 燒豬肉真係好香好好味, 食過幾次就麻咗d啦, 但勝在夠大碗, 又有一大堆我好中意嘅洋葱絲 (又係呢d!?), 轉餐又有沙律同湯(大玉之最愛!) , 都算係咁啦, 幾十蚊。重有係個位置囉, 因為尖咀通常都諗唔到食咩, 又驚要等, 又驚唔飽, 又驚貴 (就係所謂大玉咩鬼都驚嘅風範), 呢處除晚飯外, 大部份時間都唔駛話勁等, 同埋人少少, 靜靜地, 有餐飽飯你吔, 真係唔話得囉。

三洋餐廳 - 嗯, 我越黎越有佬嘅口味, 雖然都重未識/愛食魚, 但魚湯泡飯都係幾佬之選擇。呢間嘢出名好多魚(唔係多舊咩啦吓)類, 可以蒸一條送飯, 好串, 成間店都係魚嘢, 咁所以佢可以好專咁做埋魚湯泡飯, 又真係鮮味得黎唔會漿住你個口。佢湯飯都好多配搭, 我通常擇鮮雞、肉片、鮑片之類, 雞恩有次提議加咸旦, 又得, 再搭條油麥菜, 又係食飽屎你嘅好選擇。

鼎泰豐 - 其實都唔駛多介紹。我唔太多食小籠包, 覺得冇咩咁出奇特別, 我愛嘅, 通常係碟薑絲紅醋。嘩, 但係個日, 下午茶時間入黎, 一黎冇人, 唔駛等位已經心情愉快, d親切服務同國語對答又加分, 真係掂。d嘢食, 都十分好啦, 雖然講唔出有咩好, 淨係記得個小籠包頭頂d摺痕又密又細, 食落都好開心。個碗牛肉麵都喚起係台灣旅行嘅回憶, 雖然比唔上花蓮個檔唔知咩, 但湯水好濃郁。最後大家真係唔好忘記要幫親佢個廁所, 個位敬業樂業嘅廁所姨姨, 為成餐畫上完美句號。

寫住咁先。