收爐前出newsletter, 又有錯, 都話晒做咗咁多年呢d所謂會刊, 都仲有錯喎, 真係冇帶腦返工既又一證明。

講開呢類印刷品出錯, 本人經手既publications都有唔少出錯事件, 有大(鑊)有細(煲), 有爆抵打同有鬼掩眼, 包括最著名既組織名寫錯, 到像麥兜咁umbrella串咗umbanana之類既錯英文/學名串錯糗事, 瑰塊不分個類, 全部都十分難忘。 當中最對唔住既, 除咗d因為要重印而要浪費咗既樹木, 重有交託呢份job畀既我人, 即係我前任/現任老細。

對於一個都幾中意字既人黎講, 呢d鬼嘢每次都係錐心之痛。

我日後唯有用雞恩個招, 當d publications係仇人畀個機會我proofread而要金睛火眼, 雞蛋挑骨頭咁逐粒字咁對(多)幾次。

又話說我係呢度做嘢, 有一大開心係可以寫好多新聞稿, 或者做吓翻譯。當然以我咁既功力梗係畀人改到九彩咁啦, 呢方面我好冇性格架 (唔係一向都冇咩), 老細話改咩我就跟佢改, 英文就更加唔駛問, 佢地雕花咁既英文, 每改一次簡直係袋錢入我袋。

呢次, 唔知因為細老細佢己經爆忙定係點, 嗰一篇展覽前言既中譯稿, 竟然只係改咗少少。呢篇稿我譯得都算快, 始終係英譯中, 而且d內容唔太艱深, 可以畀我運用吓個丁點文采。嗰日落去展覽會場度見到d參觀人士企係前言嗰塊版前面望住中文個邊, 真係幾開心架, 又覺得自己譯既嘢原來真係有人睇, 縱然我唔知篇文譯得ok與否。

查實我細個對文字唔太感興趣 (其實對好多嘢都冇咩興趣, 除咗星相風水心理)。小五六嗰陣時, 中文老師話我知我有一篇作文得獎 題目係講電話既禮貌(認真怪雞), 撫心自問, 得獎何心虛, 可能係硬湊數啦。

呢次呢篇衰嘢都算貼堂之作了, 希望黎年都仲有d咁得意既嘢寫吓譯吓就好勒。