我諗我d負能都冇得再更負, 因為又開始有覺得個個都針對我既感覺出現。

又要馬兒好, 又要馬兒不吃草; 其實我諗我唔係個咁貪心既人, 只係對於同同事之間既關係, 感到束手無策, 其實可能好似細老細講大家都唔覺得我怪或者難相處, 全部可能只係我錯覺, 又或者大家咁樣既態度已經係為咗我而調節咗少少都唔定, 但投入唔到個團隊, 我覺得日日返工都好受罪。

而且大家洗錢pattern唔同, 令每次吹雞出去食飯都令我十分困擾, 我實在唔中意午飯食到咁Q貴, 你地冇所謂, 但我慳慣。

不過, 話說回頭, 每日既午飯時間, 我都係選擇避開大家, 可能個事實係我唔想同你地講嘢。

你地個個都好好, 但我就偏偏投入唔到, 但我又做唔到好瀟灑咁唔理人地dam睇, 偏偏會因為咁樣而(更之)唔開心。

若果撫心自問自己係咪冇試過投入, 答案可能係得六七成, 推動力唔大之下, 我都跟大家食過好多次飯, 上等人玩法坐的士去筲箕灣食魚旦河, 好可惜, 對住大家, 我仍然冇咩嘢好講。

或者我真係比較適合一個人做嘢, 或者個團隊唔好咁大, 因為我interpersonal skills真係好差。

心入面係真係有比較, 而且一如以往, 淨係識得踩自己, 或者用自己最差個樣嘢同人地最叻個樣嘢比, 玩死自己囉呢d咪。

正一煩惱自尋, 庸人自擾。