公司晨運系列　－　茶水阿姐

茶水部有位典型的阿姐；我一向不受茶水阿姐愛戴（下刪「得罪人多稱呼人少，更多係你係乜水」），一來嘴不甜舌不滑，閒來亦未懂送上或吃剩或新鮮的佳餚小食，二來總會給阿姐帶來額外工作。因此，我對茶水阿姐總帶戰戰兢兢之感，持以避之則吉的態度，盡量嘗試虛心授教。

Ok，可能被以往公司寵壞，細小的茶水部有公用食具杯碟，各式調味料同事大方公諸同好；來到新地方，一天想沖杯杯湯，在茶水部試圖尋找一隻公家杯，結果阿姐送上禮待：「你想點啊？想攞人隻杯？畀人見到你用佢隻杯唔係咁好喎？你究竟想做乜？沖乜話？啦，我畀個盒仔你沖，貴嘢，名牌黎既。」

領教過阿姐的友善程度，今日又被賜教。話說我以為茶水部的毛巾可以用來抹乾洗淨的飯盒，拿起抺布未掂盒面之際，阿姐像預先埋伏地調好時間衝進來，當場逮住，說：「你做乜攞我塊布？我用黎抹客人用既杯喎，我最驚你地用黎抹飯盒抹到一陣味，到時，哈，我地就玩完。你要抹搵其它野抺。家陣你企埋一邊抺，唔好阻住我洗杯。」

於是，我企埋一邊，企了很久，似為了挑戰自己的極限，看看還可和阿姐繼續共處一室多久時間。一直不想像同事般抽四張面紙抹乾那稱得上麻雀雖小、約兩個麥提莎盒裝大的飯盒，貫徹始終，只用了三張，慢條斯理，把兩個飯盒抺乾淨（一個飯和菜，另一個盛湯）。

明天，我會帶條抹布回去，紅白色格仔。有幸再上阿姐人生哲理工作私人醒/丙課堂，用來抹汗。